विद्यार्थ्यांसाठी त्यांनी पुस्तके लिहिली आहेत. महाराष्ट्रभर त्या विद्यार्थ्यांसाठी कार्यशाळा घेतात तसेच मार्गदर्शन वर्ग घेतात. दरवर्षी गोरगरीब दहा विद्यार्थिनी दत्तक घेऊन त्यांचा शैक्षणिक खर्च त्या करतात. १९९४ पासून त्यांचे हे कार्य सुरू आहे. गरीब मुलींच्या लग्नात त्या वस्तूरूपाने मदत करतात. विद्यार्थ्यांच्या जीवनातील कोणत्याही अडचणीत त्या धावून जातात. अगदी आत्महत्या हा पर्याय असणाऱ्या मुलांसाठी त्या देवदूत आहेत. अनेक विद्यार्थ्यांचे आयुष्य बदलून टाकण्यात त्यांचा महत्त्वाचा वाटा आहे. त्यांनी काम केलेल्या नेलकरंजी, कार्वे, मंगरूळ या गावातील शाळांचा व गावाचा कायापालट करण्यात त्यांचा पुढाकार आहे. त्यांनी केलेल्या शैक्षणिक कार्याची दखल घेऊन तालुका, जिल्हा, राज्य, राष्ट्रीय स्तरावरील आदर्श शिक्षिका पुरस्कार त्यांना प्राप्त झाले आहेत. महाराष्ट्र शासनाने त्यांना २०१७ चा आदर्श शिक्षिका पुरस्कार प्रदान केला आहे.