त्या महाराष्ट्रातील आघाडीच्या वक्त्या, सामाजिक व साहित्यिक कार्यकर्त्या आहेत. अक्षय ड्रायक्लीनर्स नांदेडच्या त्या ब्रँड अँबेसेडर आहेत. देशभरातील नामांकित व्याख्यानमाला, साहित्यसंमेलने, चर्चासत्रे, काव्यसंमेलने, क्रीडास्पर्धा, स्पर्धा परीक्षा मार्गदर्शन, व्यसनमुक्ती, स्त्रियांचे प्रश्न, आंदोलने, तंटामुक्ती, पाणी चळवळ, विद्यार्थिनी दत्तक योजना, वृक्षारोपण, पती-पत्‍नी समुपदेशन, विधवाबंदी इ. अनेक पातळीवर त्यांनी सातत्याने सहभाग नोंदविला आहे, तसेच त्यावर प्रखर आवाज उठविला आहे. मुलीच्या जन्माचे स्वागत म्हणून पंचवीस साहित्यसंमेलने त्यांनी संपन्न केली. मुलाच्या वाढदिवसानिम्मित त्या वृक्षवाटप व आरोग्य शिबिरे घेतात.अक्षरयात्री प्रतिष्ठानच्या त्या संस्थापिका-अध्यक्षा आहेत. साहित्य संमेलन आणि मूकपट, शॉर्टफिल्मच्या माध्यमातून त्यांनी देशाचे प्रतिनिधित्व केले आहे. अक्षरयात्री प्रतिष्ठानचे रौप्यमहोत्सवी साहित्यसंमेलन नेपाळ दूतवासात, बहुभाषिक उत्सव साजरा करून त्यांनी विश्वसंमेलनाचे दमदार पाऊल टाकले आहे. १९९४ पासून दरवर्षी दहा मुलींना शिक्षणासाठी त्या दत्तक घेतात. हा उपक्रम गेली २५ वर्षे त्या राबवित आहेत.